غريبه

فعلا العنوان غريب والزمان غريب بس هتتعجب لما تعرف سبب تسميه المدونه بمش عارف، خلينا الاول نعرف انا دخلت عالم المدونات ازاي ،حاجه غريبه برضه انا كنت اسمع عن المدونات من كام سنه تقريبا كنت بعتبر المدونيين عباقره بدون مبالغه والله،بالنسبه ليا انا العبد الفقير الي الله كنت  لا افقه غير التويتر والفيس والحمد لله كنت بحمد ربنا علي كده ويدومها صحه وعافيه ويحفظها من الزوال ،من سنه فتحت اول مدونه فانا استغربت ايه الكلام ده ،قريت شويه عجبني الي حد ما ،بدات ادور يعني ايه مدونه وعرفت انها وسيلة للتسجبل اي كان افكار او خواطر ..الخ حبيت الموضوع بس المشكله ان انا برضه معملتش مدونه قلت لنفسي فكك هو انا فاضي او بمعني اخر بعدين ، وفيه حاجه تانيه قلت انفسي هو انا هكلم نفسي هكتب لمين ايه الهبل ده وسبحان الله انا دلوقت بعمل الهبل ده ..ربنا قادر علي كل شيء.
نجي لكلمه مش عارف احب اقول برضه ان اسم البلوتوث بتاعي (مش عارف ) الكلمه بدات معايا من كام سنه لقيت ان كل حاجه في حياتنا بقت مجهوله والله من غير تقسير سياسات مجهولة وحكومة مجهولة حتي الناس مجهولة انا حسيت اني تهت وسط عدم المعرفه وطبعا عدم المعرفه الحسيه وليست العلمية ،كل ماواحد يسالني عن حاجه اقوله مش عارف ليس جهلا بس استغرابا لما يجري حولنا من احداث .
كنت زمان بعمل حاجه شبه المدونه بس مش مدونه الكترونيه كانت مدونة ورقيه كنت لما ابقي عايز احكي شويه اجيب ورقه وقلم واكتب كل اللي في نفسي ،فعلا كنت برتاح بس اني اتخلصت من حمل تقيل سياسه او حياتي الخاصة والعامة .

بعد الثوره اتحمست اكتر واكتر حسيت اني بدات اعرف والامور بدأت تبقي واضحه ...الحمد لله